ساكت ياوطن والحركَه تاكل بيك
لو خايف أظن والسكته من خوفك

من حرب الحرب جبنه العمر وياك
من اكل الجثث ما ينترس جوفك

مابيك الذنب كَول الذنب چا وين
يمكن نعتذر لو نفهم ظروفك

چنت المدرسه وبيك الشعب طلاب
وبس دك الجرس شو فارغه صفوفك

تقبل ياوطن يرضيك هذا الحال
ناسك للأسف تتراكض تعوفك

وتقبل ياوطن شبانك الحلوين
تتغرب غصب تحرمهه من شوفك

جاوب لا تظل ساكت يبو الثورات
عشرينك أمس اتعيش بطيوفك

من طور الحزن ملينه ما مليت
چاطور الفرح ما تعزف دفوفك

من ريد الفرح بس كون ريدك سيف
موعيب بغمد اتنامهه اسيوفك

بايكَ ما صرت ما خاف من جلاد
مو هذا شعارك هذا معزوفك

چاشنهو التغير يا عراق شبيك
مو چانت دول ما تنطق حروفك

نعتب ياوطن من حبنه الك والله
شفناكم نهر عطشان بجروفك

ومن نصحك لأن صدكَنه كلنه اخطاء
يا بيت الكرم نبقه احنه أضيوفك

أصفن ويه نفسك راح تعرف زين
لو ما تنتفض چاضاع معروفك


عذراً يا وطن بس ثور حتى نثور
لو تكَضي العمر ولقيد بچفوفك


تحيـآتي